AECA aposta pola mellora da imaxe comercial cunha formación especializada en Visual Merchandising
Nove establecementos comerciais de Arzúa participaron na formación «Visual Merchandising: Estratexias para impulsar as vendas», que combinou sesións teóricas con asesoramento personalizado nos propios negocios.
A Asociación de Empresarios e Comerciantes de Arzúa (AECA), a través do Centro Comercial Aberto (CCA Arzúa), desenvolveu durante o mes de abril a acción formativa «Visual Merchandising: Estratexias para impulsar as vendas», unha iniciativa dirixida a mellorar a presentación dos produtos, optimizar os espazos comerciais e incorporar novas técnicas para atraer e fidelizar a clientela.
A formación foi impartida polo consultor especializado en márketing comercial Mario Szabat e celebrouse os días 13, 14, 20 e 21 de abril de 2026, nas instalacións do Centro de Formación Profesional EFA Piñeiral.
Formación práctica para transformar os espazos comerciais
Ao longo das oito horas de formación presencial abordáronse diferentes aspectos fundamentais do visual merchandising, organizados en tres grandes bloques:
- Organización e distribución do punto de venda: aproveitamento do espazo comercial, colocación dos produtos, distribución do mobiliario, identificación das zonas quentes e frías e percorrido da clientela.
- O escaparate como ferramenta comercial: criterios de deseño, composición e presentación para captar a atención, transmitir a identidade do negocio e incentivar a entrada de potenciais clientes.
- Clientela, psicoloxía da compra e experiencia comercial: coñecemento dos hábitos e motivacións de compra e utilización de elementos como a iluminación, as cores, a música e os aromas para mellorar a experiencia de compra.
A formación contou coa participación de representantes de nove establecementos comerciais de diferentes sectores, entre eles calzado, moda, alimentación, lencería, fogar, decoración e materiais de construción.
Catro horas de mentoring individualizado en cada comercio
Un dos elementos máis destacados desta iniciativa foi a súa continuidade práctica a través dun programa de mentoring individualizado de catro horas por establecemento participante.
Unha vez rematadas as sesións grupais, Mario Szabat desprazouse aos propios negocios para analizar a realidade de cada punto de venda e ofrecer recomendacións adaptadas ás súas características e necesidades.
Durante estas intervencións revisáronse aspectos como a distribución do local, a presentación dos produtos, a organización dos espazos e os elementos de comunicación visual, identificando oportunidades de mellora e propoñendo actuacións concretas para optimizar o establecemento.
Deste xeito, os coñecementos adquiridos na aula puideron trasladarse directamente á actividade diaria de cada comercio.
A formación foi avaliada moi positivamente polas persoas asistentes cunha valoración excelente dos comerciantes participantes.
Estes resultados reflicten o interese dos contidos e a boa valoración da combinación de formación grupal e asesoramento directo nos establecementos.
Mario Szabat, durante o servizo de mentoring nun dos establecementos participantes na formación.
AECA continúa traballando pola profesionalización do comercio local
Con esta iniciativa, AECA reafirma o seu compromiso coa formación continua, a innovación e a mellora da competitividade dos establecementos comerciais de Arzúa.
Apostar por unha boa presentación dos produtos, unha distribución eficiente dos espazos e unha experiencia de compra atractiva é tamén apostar polo futuro do comercio de proximidade.
Desde AECA agradecemos a participación dos establecementos, a colaboración de EFA Piñeiral e o traballo desenvolvido por Mario Szabat durante as sesións formativas e as intervencións individualizadas.
Esta actividade contou co cofinanciamento da Xunta de Galicia e coa colaboración da marca Comercio Galego, no marco das actuacións de apoio á modernización, profesionalización e dinamización do comercio galego.
Seguimos impulsando un comercio local máis atractivo, profesional e competitivo!
https://www.tiktok.com/@cca.arzua.aeca/video/7638699730154933526
